بندهك

-1-
لو شيء على بالي خطر
خلاني حسيت بالخطر
ولو لقيت الهم زاد
والمشكلات زي المطر

بَـندهك واصرخ اليك
من قلب خوفي اللي انتشر
بندهك واطلب ايديك
تفك قلبي اللي اتأسر
والاقيك سامعني واحس بيك
والاقي خوفي مالوش اثر
لما اندهك

قرار
لما أندهك
تنزع مخاوفي من الجذور
تزرع في قلب ظلامي نور
وتصلح الشيء اللي جوايا انكسر

لما أندهك
أرتاح من الهم الكبير
واشعر بفرح مالوش نظير
من عندك انت يا يسوع مش من البشر

-2-
بَفرح بإثمي اللي اتغفر
بفرح بإسمي اللي اتحفر
في قلب كفّك يا يسوع
وبماضي الحب اتستر

بَندهك يملاني خير
لا اتعد مرة ولا اتحصر
يندهك قلبي الضرير
فترد له تاني البصر
قلبي اللي عاش مهزوم اسير
لو تسكنه يبقى انتصر
لما اندهك