هأمشي في طريق الصليب

-1-
مشي المسيح للصليب حامل ذنوب الكل
وشاف صنوف الألم وداق مَرار الذُل
لكنه فوق الصليب شال الديون عني
شاور بكل حنان وقال لي اتبعني
ساعتها جيت على طول ولقيتني يومها بَاقول

-القرار -
هَـ أمشي في طريق الصليب والرب ويايا
مسنود بقوة إلهي وروحه جوايا
وعينيه بتحرس سِكّتي قدّامي وورايا
والدم ضامن نصرتي وخلاصي وفدايا

-2-
أنا كنت ماشي بعيد في شرور ظلامي
رافض طريق ربنا مخدوع بأوهامي
وفي يوم قابلني يسوع لقيته قدامي
شاور بكل حنان وقال لي إتبعني
ساعتها جيت على طول ولقيتني يومها باقول

-3-
أنا كنت قافل عينيّ والطريق مسدود
والشر مالي حياتي وأملي كان مفقود
وقابلني يسوع وبحبه طمني
شاور بكل حنان وقال لي إتبعني
ساعتها جيت على طول ولقتني يومها باقول

-4-
يا كُل تايه شَريد في ظَلمتك بِتدُور
افتح عينيك عَ السّما أمل السّما موفور
تلقى المسيح بجلاله واقف بمجد ونور
ينده عليك بحنان تعال واتبعني
وتيجي ليه على طول وتجري عليه وتقول